Вуюись
Пӧртэм буёлъёсын паймытыса‚
Инэз ворпо ӟезьыеныз люке
Вуюисьлэн киыз. Жальмаськыса
Солэсь чеберлыксэ гуртмы учке.
Кӧня ук чеберез та дуннеын‚
Вуюисьлэсь нош чеберзэ маин‚
Маин воштод? Шып малпаськись инмын
Буёлъёссэ быръем-бичам бен кин?
Сылэ гуртмы‚ салкым гужем зорен
Пылатскыса‚ липетъёссэ куасьтэ.
Нош вуюись уз безды на ӝоген‚
Сыӵе чебер — ялан учкем потэ.
Сое ке учкисько‚ мон нош тодам
Тонэ вайылӥсько‚ яратонэ.
Чебер тусыд-буед кема меда
Со вуюись кадь исалоз монэ?
Но вуюись ӧвӧл тон. Чеберзэ
Вуюисьлэсь кияд уд возь‚ уд кут.
Вуюисьлы уд вера вань-ваньзэ‚
Мар сюлэмын луэ яратыку...
|