•••> В. Данилов. Азькыл

* * *

Нош ик ӟардон кошкиз инвис сьӧры,
Кыдёкысь ин сьӧр дуннее пегӟыса.
Гуртын кезьыт, нош лул пушкам пеймыт,
Бушлык ӝабыръя сюлэмме мынэсьтым.
Ох, огинлык, кыӵе тынад сямыд вылэм,
Нош мон малпай вал мукетсэ.
Азьло сямен ик циркуль йыл нуэ монэ,
Эгес кузя дунне кулэтэмлыке.
Кызьы меда та питранэз чигтом?
Вистэм пленысь кызьы пегӟом?
Ӟардон дыртэ уез нош воштыны,
Ӝегатытэк инкуазь берганъёсты.
Нош дыр пегӟе азьло сямен ик кыдёке,
Мынам катьы ӧвӧл ни сутыны сое.
Бен, мон жади, ӧвӧл ини осконлыке,
Бен, мон келяй та дуннелы ожмаськонме.
Та дуннелы, кытын ӧвӧл эшъёс
Келяй мон юн нюръяськонме.
Нош ӵуказе кин ке ӵукез пумиталоз,
Шунатыса ас льӧль малпанъёссэ,
Озьы ик оскыса яратонлы,
Кытын инты ӧвӧл алдаськисьлы.
О, Инмаре, мед удалтоз солы
Улон кузя шугтэк вамыштыны.
Бен со луоз, но со уз лу монэн,
Мон та дунне гожысь палэнтэмын.
Укно сьӧрын азьвыл сямен ик туж пеймыт.
Гуртын кезьыт, нош сюлэмам эшшо но кезьытгес.