•••> Семён Перевощиков. Азькыл

Вунэтӥ

Пыд вылам усиз кезьыт лысву‚
Возь кузя огнам вамышьясько
Малпандэ но вераны ӧд ву—
Мон али тонэн люкиськисько.

Ортчозы оген-кыкен аръёс,
Выль нылмуртъёсты пумитало.
Адӟыса‚ кӧня пӧртэм синъёс‚
Мон тонэ тодам ваё‚ оло?

Учкыны быгатылӥд чебер‚
Тодӥсько на: дун ошмес дорын
Асьмеос вераськимы туж бер‚
Учкылӥм мӧзмыт толэзь шоры.

Тон соку ватӥд яратэмдэ‚
Мӧзмемдэ нош чик‚ лэся‚ ӧд шӧд.
Со ӝытэ умме уси мырдэм,
Нош малы, малы меда? Ӧйтӧд.

Мон понна — нырысь со минутъёс,
Нош тыныд — дышем часъёс, шӧдске,
Пиштӥзы инмын кизилиос,
Валасьтэм на вылӥськем, иське.

Пыд вылам усиз кезьыт лысву,
Возь кузя огнам вамышъясько.
Нош али, шуом, дорам тон ву—
Чылкак пегӟоно кадь потӥсько.