Ми озьы но тонэ яратом
Возь вылысь бабылес кызьпуэз
Сурсвузэ юыны ӵогиллям.
Толон ӝыт арганчи Василэсь
Нылмуртъёс сюлэмзэ чигиллям.
Шуиллям: тон усто арганчи‚
Шулдыресь шудоно гуръёсыд‚
Нош ӧвӧл на‚ Вася‚ тынад чик
Нылъёслы ярамон сюлэмыд.
Ну кутскиз ук‚ кутскиз шудыны‚
Возьмато‚ пе‚ али соослы.
Василэсь сюлэмзэ тодыны
Кылдымтэ на тӥлед‚ нылъёслы.
Нош кылӥз-а Вася кырӟанзэс?
Кылысал ке, ваньзэ тодысал‚
Эктон гур шудысал арганэз‚
Нылъёсты огинэ люкаса.
Исало ке соос — гажало‚
Сюлэмдэ чигемысь дугды тон.
Кылӥськод-а‚ тыныд кырӟало:
«Ми озьы но тонэ яратом...»
|