Тылскем дорын
Вожмаськыса пеймыт инме
Ӝутско тылгизьыос.
Кытчы меда вуо соос?—
Кыньыртӥсько синме.
Сайкыт омыр вань мугорме
Юзмытыса вуэ.
Бурдзэ‚ лэся‚ ветта вуэ —
Вань жадемме ворме.
Тачыр вазё куасьмем вайёс‚
Уг куректо‚ шудо.
Берпум куара сёто‚
Ӵуж-горд тыллы пӧрмо соос.
Малпанъёсы сураськизы‚
Ини вадьсам инбам
Кизилиоссэ пазям.
Ма ку меда ӝуатскизы?
Кизилиос доры ке вуысал
Тылскемысьтым озьы
Огез коть тылгизьы‚
Ӝуась тылэз юнгес яратысал.
|