•••> Семён Перевощиков. Азькыл

Малпасько

Кык-куинь нунал кылиз на ужанэз‚
Тани ӝоген кошкоз шутэтскыны.
Мылкыдыныз нош паймытӥз монэ:
Сюлэм‚ пе‚ куриське яратыны.

Мае меда? Озьы нырысь малпан‚
Пересьёслэн ӵемгес одӥг сямзы:
Шуныт корка‚ нянь пуш но чай
Кулэ сыӵеослэн улоназы.

Нош таизлы‚ эшъёс‚ зэмзэ пайми,
Егит нылмурт азьын сюлмыз шунам.
Ачим кыӵе меда мон адями‚
Кыӵе луо пересь арлыдъёсам?