Чупчи
Шумпотон ке пачыл‚ кузь сюрес но вакчи‚
Ӵук тӧлъёс ортчыло возь вылтӥ.
Дебёссын но Чупчи‚ Глазовын но Чупчи -
Визыла кызьпуо шаертӥ.
Кыдёке вуозы Чупчилэп вуосыз—
Кырӟанмы‚ кылбурмы со милям.
Бен соин но, вылды‚ кемалась дыръёсы
Чупчиез удмурт шур шуиллям.
Шудыса эркынак верасько куспазы‚
Погыльско лыз-чагыр тулкымъёс—
Шат куке но тазьы шуд сярысь малпазы
Эрико улонэз утчасьёс.
Нуналъёс но аръёс ог-огзэс весь вошто‚
Шаермес нош уг кельты Чупчи.
Удмуртъёс но ӟучъёс уж дуре вамышто‚
Мылкыдзы туж чебер но капчи.
|