•••> Елена Панфилова. Азькыл

Вакытлэн нылыз

Мон нылыд тынад, Вакыт -
Кӧшкемыт мыным, шурдыт.
Мон нылыд тынад, Вакыт.
Малы бен бордад ӧд кут?
Ваньзэ сьӧрад валтӥськод,
Бергатӥськод, изӥськод,
Ӝутӥськод но пазьгиськод,
Нош ик, нош ик изӥськод…
Ворса, ворса синъёсме!
Эн висеты сюлэмме!
Уллёлэсь висъям мылкыд
Уллёяз ик куриське.
Мон нылыд тынад, Вакыт,
Малы нош бордад ӧд кут?
Кыӵе лул мыным сётӥд?
Малы палэнэ пуктӥд?
"Сыл но учкы, - тон шуид -
Малпа, бергаты ачид".
Уг чидаськы сылыны,
Пилиське лулы-сюлмы.
Мон нылыд тынад, Вакыт!
Вирсэрам тынад вирыд!
Малы бен нимаз карид?
Йылсо сэреге пуктӥд?!