ВОЙНА ЯЛОН
I
вож бусыын
турын куаръёс но сяськаос пӧлын
тон пукиськод котькуд ӵукна
вань кужмыныд ик
кыскиськод
пушкад
музъем тулкымъёсты
шунды тылгожъёсын
веръямтэзэ
чылкыт инвуосты
шат вань
талэсь но шудоез но узырез —
изён дунне —
югыт ворекъяса сайкась
ӵукна сайкытлыкен
шокась омыр
но эрикен тырмем
тӧлъёс-тутыгышъёс пушкын…
II
-тон
нырысьсэ
туннэ
сайкад:-
«Адӟыны, кызьы вордске вылез нунал,
Кызьы со усьтӥське
Азяд, ватэм малпанъёссэ тыныд шараяса, —
Инме ивортыны асладӵукнаедлэсь сяськаямзэ…»
- адӟыны
кызьы удмурт пинал
киён сямен нонэ
котькуд ласянь
юн сантэмам
удмурт кылзэ,
кызьы удмурт анай
аслаз вир пушкысьтыз
солэн вираз люка
юн сантэмась
ёркытлыклы пумит
динамитсэ-
III
тӥ учке Ай
кыӵе
йќно
сыло
Кызъёс —
Батыр Вынъёс Кадь Ик —
одӥг но кышкантэк
нош Вӧ-
зазы
чалмыт
пуке —
киос-
тылэсь уг шӧды шунытсэс — Со —
туж визьмо но туж кужмо пересь —
Мадон-
на Кадь
Сокем
Чылкыт —
тужгес но ӝужытэз Гурезь!
отчы мед йӧтскозы пыдъёс! —
Кужмо Тылын Сутӥськонын –
Выль Лул Вордскон…
IV
вань
Чильпырась
Алмаз
Сӥньыс
вань
Йыр но Пель —
Ы-
Р-тӧл
Синкаштэм Син:
Алмаз гижы —
Зарни йӧвалегтӥ
Ь (небыт) вамышъяны
вань
Сюло
Югдытъясь югытэныз кудӥз
Лулэз
Эмъя
Марӟан кадь мед югдоз шуыса
V
-котькуд
вамыш
азьын — кышкан —
туж ӝокаськод
ке но
њоскыт
корридоръёс
пушкын-
«Мон — эрико — кызьы-о мон
сэрегъёсы пачкай?!
Кытын тон, Шундые? Кытын-о
Выж — «ЗАРЕЗЬ, ОМЫР но ВУ» —
Чарланъёсы?!
Мон вал шудо отын,
Мон вал шудо!
Кыӵе ческыт вӧлскиз
Омыр —
пушкам оскон пыӵатыса.
Мон луысал УЛЭП —
Быдэс гумыр —
Шаерелы шумпотыса —
мон луысал ЛУЛО!»
-уг уг
уг быры мон
уг кул
шедьтӥ ке кышканлэсь бадӟым кужым —
ёркыт сэрегъёсты пазьгылыса
мон —
пуштонэн
пото —
чечен нылъёс сямен-
VI
Мон
Сьӧд Монах кадь
сылӥсько
Быдӟым Гурезь йылын —
Кышномуртлы уг кельшиськы.
Котыр — Сьӧд-Сьӧд Нюлэс
Вылын — Толэзь —
Черсӥськыса — Улэ —
мар ке но сипыртэ Со —
тодмотэм кылын —
Бугор Ачиз Полэстӥське…
— Кинлэсь бен улонзэ
тазьы тон биниськод? —
учки солэн сюлмаз.
— Тынэсьтыдзэ сюресъёстэ, — вазиз.
— Оло, монэ дорад ни кыскиськод? —
солэн сюлмаз лэзи алмаз…
— Тон чида, вазь на ай, вазьгес… — мертчиз…
«Уйшоре кадь ыши (йыроми)
Котыр — шимес нюлэс ланга…»
-синмам — лыз ӝуась тыл
ымам лыз ӝуась кыл
мыным кулэ ӧвӧл рай
мыным кулэ война-
малы ке шуоно
монэ ӧз вие на
* * *
Мон кышкасько,
Мон кышкасько,
Сьӧд куакаос шайвылъёсы пуксьылозы,
Гуос вӧзын будӥсь сяськаосты ишкалозы,
Кылем няньмес кокчалозы;
Нош собере вань лыосмес пазялозы.
Мон кышкасько,
Шунды ышоз чылкыт сюлэмъёсысь.
Малпанъёсме-мылкыдъёсме
Тараканъёсты сямен виылӥсько,
Интернет вирусъёсты кадь куясько,
Бадӟым резинкаен пӧрмымтэ суредэз сямен
Ӵушылӥсько.
Но кышкасько,
Озьы ке но
Мон кышкасько,
Ненег гинэ, чылкыт возиськисез понна.
VII
Уйшоре
дорам
пичи пинал пыраз:
Лызмыт пеймытысь адӟи
Зарни шеп кадь юг
Пинал мугорзэ…
Бабыля йырсиосыз
Алмаз синьысъёс кадь ик кисьтаськизы…
Сыӵе шудо со серекъяз…
Сыӵе шудо со черекъяз…
Вӧзтӥм ветлӥз…
Тэтчаз… Эктӥз…
Сокем капчи вал тэтчанэз,
Сокем чебер вал эктонэз…
Нош синъёсаз — сайкыт шумпотонэз…
Югыт тылэн мальдӥз синмам.
Шудо учкиз укно сьӧрысь толэзь…
Чиль – ворекъясь иншар
Укно сьӧры ышиз…
Бӧрысь адӟи толэзь вӧзысь,
Кызьы Ангел но Агний
Пичи нуныез тӧдьы бурдъёсазы кутӥзы…
Кинлэн о потэ сыӵе нуныез виемез
Яке
Сиемез,
А?
VIII
Одь-ин,
Одь-ин, тонэ шуо вал От
нош мон от-морт нылаш
усьты бадӟым гын шляпаед улысь
Одӥг Синдэ, вай мыным
Тямыс Пыдо Валдэ но асъёстэ
мынам сайкатэме потэ ВИЕЗ
ляльчиосыз саникъёсын
мед усьтозы Солэсь секыт синлысъёссэ
адӟиз ке Со монэ
мон тодӧсько: уг кул
ВИЙ уз вийы та вие вийыны сётэмзэ
|